to be or not to be...

[david]

Software askearen abantaiak, justifikazioak, migrazioak izan ditzaken arazoak eta konponbideak... gai guzti hauek oso garatuak badaude ere, bai foro honetan bai sarean, nire uste apalean badugu beste gai potolo bat jorratzeko eta hau da:

ikastolok software egileak bagara ere, ze nolako aplikazioak sortu beharko genituzke? pribatiboak ala askeak?

Gure federazioaren wegunea ikusita eta bertan agertzen diren helburuak ikusita argi dago... ikastolok daukagu izaera herritarra eta eraldatzailea hezkuntza sisteman.
Softwaren esparrura eramanda, ez genioke gure aplikazioak eskaini behar hezkuntza komunitateari gure lanaren etekin soziala handituz eta benetan gizartearen eragilean bihurtuz???

Bitxia bada ere, zeinbait ikastoletan argi daukagu software askearen aldeko apostua egiteko behartuak gaudela (eraiki nahi dugun gizarteak behartzen gaitu hain zuzen ere), eta migrazioari aurre egiteko orduan ditugun arazorik handienetariko bat gure software propioa erabiltzea da (ikasdat esate baterako)

Aplikazioak sortzea koste bat daukala argi dago, eta bide honetatik jarraitu nahi badugu (hori ere plateatu daiteke, ala ez?) koste horiek finantziatu behar dira, baina zer gertatzen da gastu guzti horiek bai dirulaguntzen bidez bai beste sarreren bidez ordaindu direnean? Ez al gaude behartuak gure produktuak askatzera?

Demagun prozesu hau ezinezkoa dela eta gure produktuak salmenten diruarekin ere defizitarioak direla. Orduan suertatzen zaidan galdera beste bat da: jarraitu behar dugu bide honetatik edo beste bide batzuk jorratu beharko genituzke???

Ikasleei software askearen aukerak eta proiekzioa azaltzerakoan beti adibide berdina jartzen diet, munduan ez dago enpresarik komunitate osoarekin lehia egin dezakeena. Errealitatea ukatzeak lagunduko al gaitu?

Marketina egitea ezinbestekoa da, baina bide ezberdinak daude...

[Mikel Etxarri]

Nik uste dut Ikastolen Elkartearen barnean, eztabaida hau esparru guztietan eman beharko litzatekeela, ez softwarearen alorrean bakarrik. "Enpresa tradizional" gisa funtzionatzen du eta horixe da bere ikuspegia (bulegoen disposizioa ikustea besterik ez dago).

Baina gurera itzuliz, Elkarteak sortzen dituen materialak eta software guztien atzetik filosofia berdina dago: errentagarritasuna. Ikasmaterialak, jada, ez dira ekoizten gure proiektu propioa sustatzeko, ikastoletan sortutako beharrak asetzeko edo egindako eskaerei erantzuteko, bertako egitura mantentze aldera finantziazio iturri bat lortzeko, baizik.

Diru laguntzak handik edo hemendik lortuz, salmentak handitzeko Santillana argitaletxeak egingo lukeenaren antzekoa eginez... horrela mantentzen gara eta aurrera segitzen dugu. Softwarearen ekoizpenean, antzeko parezido. Aipatzen dituzun arazo horiek eta Aitorrek CDen inguruan aipatu zituenak, ezagutu ezagutzen dituzte, baina, behin baino gehiagotan aipatu zaigun bezala, zertarako aldatu gehienek Windows eta Internet Explorer erabiltzen badute? Horixe da aplikazio eta baliabide horien atzean dagoen filosofia (gehienek hori erabiltzen badute eta saldu behar badugu, zertarako ekoiztu estandarretan oinarrituta? Merkatua Windows munduaren inguruan dago.)

Bestalde, gizarte eragile eta eraldatzaile gisa azaltzeko, ekintzak ,ez hitz politak, dira definitzen gaituztenak. Nik uste dut ikastolok gauza asko egin dezakegula, baina aldaketa sakon bat derrigorrezkotzat jotzen dut.

Hau guztia esanda, ezin dut mezu hau kritika hutsean utzi. Gure Elkarteari egiten duen lana aitortu beharko diogu. Ez dugu ahaztu behar euskaraz ekoiztutako materialak apenas zegoela gure Ikastolen Elkartea ekoizten hasi zen arte. Gainera, bertako profesionalen gorengo kalitateari esker, euskaraz ekoiztutako produktu duin ugari eskuratu dugu.

Bukatzeko, nik uste dut ikastolok abiapuntu pribilegiatu batean gaudela. Egitura sendo, urte askotako eskarmentua eta kalitate handiko profesionalez osaturiko talde bat dugu. Abiapuntua hori izanik, Elkartea bide berriak "esploratzen" eta filosofia berri bat aplikatzen hasi beharko lukeela pentsatzen dut. Ezin da itsasoari ateak jartzen jarraitu. Hori egiten segitzen badugu, alferrik galdutako urteak izango dira eta olatua galtzeko arriskuan jarriko gara.