Erabiltzaileak multzoka sortu Active Directoryn: irtenbide bat

[jolaus]

Azkenean uste baina azkarrago lortu dut kontu guztiak sortzea. Irtenbide on bat aurkitu ezean, aste osoa kontuak sortzen pasako nuela imajinatzen ari nintzen baina azkenean, goiz bateko lana izan da. Kontutan izanda ikasle bakoitzak sarerako eta posta elektronikorako sarbidea ikastolan egindako ibilbide osorako izango duela, ondo aprobetxatutako denbora izan dela iruditzen zait. Dena den, datuak sartzen baino gehiago, aurreko planifikazioa egiten pasa egiten pasa dut. Zuetako norbaitek gauza bera egin nahiko balu, hemen azaltzen dizuet zein izan den aurretiko planifikazio hori; ea horrela lana aurrezten laguntzen dizuen.

1. Helburua: LHko 1. mailatik DBHO 2. maila arte ikasle bakoitzari erabiltzaile bat sortzea Active Directoryn eta posta kontu bat Google Apps-en.
2. Erabilitako bitartekoak: ADMAnager Plus! aplikazioa, IKASDATek ematen dituen "komatxoen bitartez banatutako" CSV zerrendak (tira, egia esan nik idazkariak pasatutako ikasleen zerrendekin egindako bi Word dokumentu erabili ditut).
3. ADManager Plus!: Active Directory (AD)-ren kudeaketa asko errazten duen Javan garatutako Windows aplikazio bat da. Aplikazioa sarera konektatu dagoen edozein ekipotan instalatu daiteke; berak bakarrik antzematen du domeinua eta lokalizatzen du zerbitzaria. Ordaindu beharreko (eta asko gainera) lizentzia erabiltzen du. "Medikamentua" aurkitzen aritu naiz hortikan zehar baina, antza denez, "botika gehienak itxita zeuden". Dena den, Trial bertsioak 30 egunerako balio du eta, erabiltzaileak multzoka sortzeko aukeran behintzat, ez du inongo mugarik ipintzen. Esan bezala, ADren kudeaketarako aukera ugari eskaintzen ditu, erabiltzaile kontuak, taldeak, ekipoak, baimenak... sortu, editatu eta ezabatu daitezke AD berak duen interfaze atseginago batetik. Erabiltzaileak sortzerakoan komeni da lana ondo planifikatzea: kontu baten plantila sortzeko aukera ematen du, ezaugarri orokorrak aurretik definituz. Ondoren, plantila horretan oinarrituta sortu diren ikasle guztiek kontu ezaugarri berdinak hartuko dituzte.
4. 1. urratsa: ikasleen kontuek izango dituzten ezaugarriak definitu eta txantiloia (template) bat sortu ezaugarri horiekin ADManager Plus!-en Nire kasuan hauek izan dira hartutako erabakiak: loginerako erabiltzailea "izena.abizena" motakoa izango da, pasahitza nik aurretik zehaztutakoa eta ikasleak aldatu ezingo duena, ikasleak promozioka antolatu ditut bakoitza OU batean egongo delarik "ikasleak" izeneko OU nagusiaren barnean (segurtasun politikak hartu behar badira aurretik antolaketa hau egitea beharrezkoa da) eta, azkenik, ikasle bakoitzak karpeta pertsonal bat izango du mapeatuta MiPc-n (txantiloian "home folder" delakoan \\zerbitzaria\ikasleak\%username% lerroa idazten badugu karpetak automatikoki sortuko dira erabiltzaile bakoitzaren izenarekin). Esan bezala, hau dena oso modu errazean konfiguratu daiteke ADManager Plus!-en. Behin txantiloia osatuta dagoenean "ikasleak" izenarekin gorde dut.
5. 2. urratsa: ikasleen datuekin CSVa sortu Txantiloia ondo definituta badago aurretik, kontuak sortzeko nahikoak dira bi zutabe datu csv fitxategian: lehenego zutabea "givenName" bezala izendatu behar da eta bertan ikasle bakoitzaren izena joango da eta bigarren zutabea "sn" bezala izendatu beharko da eta bertan ikasle bakoitzaren abizena joango da (nire kasuan hirugarren zutabe bat gehitu dut pasahitzarekin, nik eskuz ipintzea erabaki dudalako baina txantiloia egiterakoan ADManager Plus-en lehenengo loginean erabiltzaileak berak bere pasahitza zehaztea aukeratu daiteke).GARRANTZITSUA: csv fitxategia gordetzerakoan erabilitako kodifikazioa Mendebaldekoa (ISO-8859-15) erabili. utf-8 erabiliz gero, csv fitxategia inportatzerakoan ADManager Plus-era "ñ"-ak eta tildeak galdu egiten dira (lehenengoen kasuan mordoxka bat agertzen dira izena eta abizenetan
6. 3. urratsa: csv-a ADManager Plus-era inportatu. ADMPlus-en admini gunean "AD Mngmt" hautatu eta "Create users" lekuan sartu. Lehendabizi aurretik sortutako txantiloia aukeratu beharko dugu leihoaren eskuinaldean agertzen den lekutik. Horrela kontu guztiek guk aurretik definituta ezaugarriak izango dituzte. Ondoren, "Create bulk users" aukeran klik egin eta aurretik sortutako csv fitxategia igo. Dena ondo badoa, fitxategian ditugun ikasleen zerrenda ikusi ahal izango dugu. Aurrera egin eta segundotxo batzuen ondoren, kontu guztiak sortuta izango ditugu, bakoitza bere OUn eta bere karpeta pertsonalarekin. ADMPlus-ek izenen bat errepikatuta topatzen badu (450 bat kontutik bost izen bakarrik agertu dira errepikatuta), erabiltzaile izenaren amaieran 2 bat erantsiko du. Aukera hau, dena den, aurretik definituta izan beharko dugu sortu dugun txantiloian.
7. 4. urratsa: posta kontuak sortu GApps-en. Honetarako aurretik sortu dugun csv-an moldaketa txiki batzuk egin beharko dugu. Aurretik sortuta genituen hiru zutabeen aurretik laugarren bat gehitu beharko dugu. "username" hitzarekin izendatuko dugu eta bertan sortu berri ditugun windows-eko erabiltzaileak erantsiko ditugu (zoritxarrez GApps-ek ez dauka erabiltzaile izenak, izen eta abizenetatik automatikoki sortzeko aukera). Erdiko bi zutabeen izenburuak aldatu egin beharko ditugu: "givenName"-en ordez "firstname" eta "sn"-ren ordez "lastname" idatziko dugu. Laugarren zutabea berdin mantenduko dugu, "password" izenburuarekin. GApps-eko admin gunera sartu eta "Create user bulk accounts" hautatuko dugu. Aldatutako csv berria inportatuko dugu. Hemen ere, denbora gutxiren ondoren kontu guztiak erabilgarri izango ditugu. OHARRA: GApps-ek ez ditu onartzen "ñ"-ak posta helbideetan. Horregatik, "username" zutabeko izenetan egongo diren "ñ"-ak aldatu egin beharko ditugu; pena bat da baina arazo honekin ezin da ezer egin.

Esan bezala, prozesu honekin 450 bat kontu sortu ditut goiz batean; ikasleek windows eta posta kontu bana jasoko dute gaur, erabiltzaile eta pasahitz berdinekin bietan.