Nola hartu root erabiltzailearen baimenak?

[jolaus]

Kaixo lagunok

Hemen natorkizue beste galdera tonto batekin. Ubunturen instalazio garbia egin dut azkenean nire eramangarrian. Duela egun pare batetik hona Ubuntu erabiltzaile ofizial berria bihurtu naiz. Orain arteko esperientzia oso positiboa izan da. Synaptic gozada bat da; Gparted erabiliz partizio desberdinak sortu ditut sistema eta datuetarako; gaur OpenOffice 2.4 RC2 instalatzea lortu dut deb paketeak eta Terminala erabiliz (ospatzeko etxean ardo botilatxo bat ireki dut ;-)

Baina, gauza ezberdinak egiten saiatzen ari nintzela birritan topatu naiz arazo berdin baten aurrean. Sisteman aldaketatxo batzuk egin nahi izan ditudanean baimenik ez daukadala esaten dit sistemak. Konkretuki errepositorioen zerrendara berriak gehitu nahi ditut baina /etc/apt/ karpetan dagoen sources.list fitxategia ezin dut editatu.

Erabiltzen ari naizen gidan dioenez, sistemako lehenengo erabiltzaileak administradore baimenak hartzen omen ditu baina dirudienez baimen horiek ez dira "baimen guztiak". Nire erabiltzailea "root" taldera gehitzen ahalegindu naiz baina ezin dut. Saioa root erabiltzailearekin nola hasi dezakedan ere irakurri dut baina ez dela gomendagarria diote ere.

Nola demontre eskura ditzaket root erabiltzailearen baimen berdinak nire saiotik?

[joseba]

Beno, aspaldiko mezua den arren, orain ikusi dut eta agian norbaiti ongi etor dakioke erantzuna:

root pribilejioak lortzeko hainbat era daude:

1.- Erabiltzailearen araberakoa: bi erabiltzaile mota bereizten ditu ubuntuk, alde batetik "sudoer" bezala katalogatuak (sudo agindua erabil dezaketenak) eta beste aldetik erabiltzaile xumeak. Erabiltzailea sortzerakoan administrazio gaitasunak ematen bazaizkio "sudoer" bat sortzen da. Horrelako erabiltzaileek agindu "pribilejiatu" bat exekuta dezakete aurretik sudo hitza erantsiz. Esate baterako

$sudo mount /dev/hda1 /media/uindous

Agindu horrek hda1 partizioa /media/uindous direktorioan montatuko luke, baina lehendabizi erabiltzaileari bere pasahitza eskatuko dio, pasahitza ondo sartuz gero, eta erabiltzailea sudoer motakoa bada, agindua bete egingo da, bestela haizea hartzera bidaliko gaitu "only root can do that" esanaz.
Root pribilejioekin agindu asko exekutatu behar badira, terminal bat ireki dezakegu root pribilejioekin:

$sudo xterm

horrek terminal berri bat irekitzen du, eta leiho horretan egiten den guztia root-en baimenekin egiten da.

2.- root erabiltzailea aktibatu eta "su" agindua erabiliz root bihurtu. Ubuntu sistemak root erabiltzailea badauka, baina ez dauka aktibatuta, alegia, pasahitzik jarri gabe dago. Aktibatzeko nahikoa da root erabiltzaileari pasahitza jartzea. Horretarako sudoer erabiltzaile bat behar da, eta erabiltzaile horrek root erabiltzaileari pasahitza ezarri behar dio (erabiltzaileei pasahitza aldatzeko root-en pribilejioak behar dira, eta "sudoer" batek baimen horiek lor ditzake sudo aginduaren bidez, aurreko aukeran azaldu dudan bezala):

$sudo passwd root

agindu horri hiru pasahitz eman behar zaizkio: lehenego erabiltzailearena (sudo erabili ahal izateko erabiltzailearen beraren pasahitza behar da, eta erabiltzaileak "sudoer" motakoa izan behar du), ondoren root erabiltzailearentzat pasahitza eskatuko digu, eta azkenik, root erabiltzailerentzat ezarri dugun pasahitza berriz idazteko eskatuko digu (nahasketak ekiditeko teknika da bi aldiz eskatzea). Pasahitzak idzten ari garen bitartean pantailan ez da ezer ikusten, alegia ematen du ez dugula ezer idazten, baina, bai. benetan idazten ari gara, eta pasahitz bakoitzaren ondoren "return" sakatzen dugunean, gaizki tekleatu badugu, pasahitz okerra sartu dugula esango digu.

Behin root erabiltzaileari pasahitza emanda, edozein erabiltzaile root erabiltzaile bihur daiteke, beti ere root-en pasahitza ezagutzen badu! Hori egiteko su agindua erabil dezake:

$su
password: (root erabiltzailearen pasahitza eskatzen du)
#

pasahitza ondo tekleatuz gero, sistemaren sinboloa aldatzen du, $ izatetik # izatera pasatzen da, root-erabiltzailearen baimenak dauzkala adierazteko.

Beno, honekin nahikoa.

[jolaus]

Apa Joseba. Ongi etorri taldera!

Oso argia zure azalpena. Jasota geratzen da nire del.icio.us-eko gogokoetan