Ikastolako Sarea Linuxpean

[Miren Karmele]

Kaixo denoi:
Aspaldi nago Soft askearen alde eta Ikastola Linuxpean funtzionala izan leitekela uste dot. Hala ere, beti entzun dut lelo berdina: "lokala erreza da baina, sarea?"
Hartara, Asmoz fundazioak antolatzen duen "Linux sarean" izeneko masterra egitea erabagi neban eta horretan nabil aurton, buru belarri eta asko kostata baina neure "saltsan".
Gauza da ikastaroko azken modulua burutzeko lan bat egin behar dala, eta nire aukera "Ikastolako sarearen migrazioa Windows-tik Linux-era" izango dala. Beraz, eskertuko neuskizue horrelako migrazioa egitearen inguruko ideiak edota zalantzak komentatzea. Akatsak non sortu litekez? Zer gurako zeunkie frogatu? Zer uste dozue egin beharko litzatekela? Badakit zuetariko batzuk honetan saltzeatzen ibili zariela jada. Zein arazo aurkitu dozue? Burura jatortzuen edozein iradokizun baliogarria egingo jat.
Laster arte

[jolaus]

Kaixo Miren Karmele

Ziur aski ez naiz ni pertsona egokiena planteatzen duzunari "fundamentuzko" erantzun bat emateko baina, tira, bidea urratzen hasiak gara eta orain arte bizi izan duguna agian baliagarria izango zaizu. Beraz, hementxe gure ikastolan, gai honen inguruan orain arte egin duguna:

1. Prozesuaren abiapuntua IKT taldean zehaztu genuen dokumentua izan zen (azpian daukazu pdf formatuan). Bertan, migrazioaren aldeko argudioak zerrendatu genituen; mota askotariko arrazoiak zerrendatu genituen bertan: batzuk kontu ekonomikoekin zerikusia zuten, beste batzuk lege kontuekin eta beste batzuk, etika eta baloreetan oinarritutakoak ziren. Txosten hori irakasle guztiei banatu genien eta etapaz-etapa bertan zetorrenaren inguruan eztabaidatu genuen. Egia esan, ez nituen kontrako iritzi gehiegirik entzun. Hasiera batean espero nezakeena baina hobe joan zen dena.
   • BALORAZIOA: migrazioaren justifikazioa ikuspegi ezberdin askotatik egin daiteke. Nik "ikastola irekiaren" ideian sinesten dut, software askeak dituen balore etiko eta filosofikoetan sinesten dut, baina uste dut nire irakasleek, orohar, ez dutela berdin ulertzen ikuspegi hori. Uste dut migrazioaren gaia klaustroari aurkezterakoan pragmatikoagoak izan behar garela. Horrelaxe jakinarazi zidaten lankide batzuek; gehiago sakondu behar dugu kostu ekonomikoaren alderditik (lizentziak, diru kostuak...), Microsoften produktu berriek ematen dituzten bateragarritasun arazoak argi eta garbi adierazi behar ditugu (docx famosoak, ...) Tira, ez dakit, nire iritziz badira bestelako arrazoi garrantzitsuak ere aipatu beharrekoak, zuk ikusi beharko duzu hori. Dena den, bai da egia gauza bat alde batera uzten dugula beti; beti justifikatzen dugu software askearen erabilera konpetentziak dituen gabeziak azalduz. Uste dut argi eta garbi adierazi behar diegula gure lankideei software askea KALITATEZKO SOFTWAREA dela, ERABILERRAZA eta GURE LANA ERRAZTEKO UNE HONETAN MERKATUAN DAGOEN SOFTWARE EGOKIENA. Horretan, nire ustez, mentalitate aldaketa nabarmena eman behar da.
2. Txostenean adierazitakoa behin onartu ondoren, migrazio prozesuari ekin genion. Orain arte egin duguna ulertzeko egokiena gure bloga bisitatzea duzu. Bertan ikusiko duzu zein den orain arte egin dugun bidea. Aurtengo ikasturte osoa eraman dugu Firefox, OpenOffice eta GApps etapa guztietan erabiltzen.
   • BALORAZIOA: oraindik ez dugu balorazio ofizialik egin, beraz, hementxe jarriko dizudana momentu puntualetan jasotakoa besterik ez da. Orokorrean, irakasleriaren jarrera oso baikorra izan da. Eta nire ustez hori balorazio orokorrean antzeman da; salbuespen batzuk kenduta, gehinak oso gustura ibili dira Firefoxekin. Internet Explorer baina mila aldiz hobeagoa dela ikusi dute. Gehigarrien kontua asko gustatu zaie. Openoffice-ekin ere ez dira arazo gehiegirik egin. MOffice-ekin ekoiztutako dokumentuak irekitzerakoan ez dira arazo gehiegi sortu. Eta izan direnak, OOo-ren akatsak baino gehiago Word-en gaizki diseinatutako dokumentuen errua izan da (orri batean baino gehiagotan sortutako taula infinitu horiek, adibidez). Batxilergoko irakasle batzuk kexu agertu dira OOo-k duen ekuazio editorearekin; egia da ez dela MOffice-ek duena bezain intuitiboa baina ez dut uste, oztopo salba ezina denik OOo-rekin jarraitzeko. Badira irtenbide desberdinak arazo hori konpontzeko. Gure kasuan, kexa gehienak IKT profil baxua duten irakasleengandik etorri dira; ohiturak aldatzea kostatzen zaien irakasle horiengandik. Askotan, nahasten dute erabilera okerra tresnaren akatsarekin. Dena den, ziur nago Windows 7 eta MOffice 10 berriekin ere, hauekin arazo berdinak izango genituzkeela.
3. Une honetan sare osoa Ubuntupean ipintzeko bidean gaude. Aurrera egin baino lehen, dena den, orain arte gertatutakoaren balorazioa egitea falta zaigu. Horren zain gauden bitartean, dagoeneko egin dugu migrazioaren azken fase honen diseinutxo bat. Hementxe dauzkazu emango ditugun urratsak:
   • ZERBITZARIA: Ubuntu Server-ekin hainbat proba egin ondoren, azkenean openSUSE instalatzea erabaki dugu. Active Directory-ren migrazioa OpenLDAp bitartez egiteko konpromisoa hartu dute gure teknikariek. Pendiente geratzen zaigu segurtasun kopien kontua. Birus-kontrakorik, printzipioz, ez dugu erabiliko. Hasiera batean, migrazioa sareko ekipo guztiekin batera egiteko asmoa genuen, baina azkenean, zerbitzariaren migrazioa aurreragorako uztea pentsatu dugu. Sareko ekipoak lehenik Ubuntura pasako ditugu eta zerbitzariaren migrazioa jarraian egingo dugu.
   • SAREKO BESTE ELEMENTUAK: orain arte bezala, IPak DHCP zerbitzuaren bitartez esleituko dira. Kontutan izanik sareko gailu kopurua 250etik gertu izango direla datorren urtean, ziurrenik oraingo IP bitartea zabaldu egin beharko dugu. inprimagailuekin ez dugu arazo berezirik ikusten; fotokopiagailuarekin, berriz, hainbat gauza probatu beharrean gaude oraindik. Gurea RICOH Aficio 2051 bat da. Une honetan, fotokopiagailuan autentifikazioa sareko ekipoetan bezala gertatzen da. Fotokopiagailu honek Linuxerako driverrak dituen arren, ekipoetatik inprimatzea ez da behar bezala burutzen. Ziurrenik autentifikazio kontu horrekin zerikusia izango du honek; hori aztertzekotan geratu gara.
   • EKIPOAK: Ubuntuk zerbaitetan hobetu badu azkenaldian hardware kontrolatzaileen kudeaketan izan da. Ez dugu espero arazo berezirik arlo honetan. Dena den, jarraipen berezia egin behar diegu txartel grafikoei eta sare txartelei. Ubunturen eguneraketak arazo bat dira; ekipo arruntetan eguneraketa automatikoak abantaila ikaragarriak diren bezala, sarean dauden ekipoekin abantaila hori arazo bihur daiteke. Printzipioz eguneraketa automatikoak kendu egingo ditugu (IKASYSeko ekipoetan bezala) baian gure asmoa da, denborarekin, eguneraketak modu zentralizatuan burutzea. Ekipo batek jasoko ditu eguneraketa guztiak eta honek bidaliko ditu gero eguneraketa guztiak ekipoetara, ordu jakin batzuetan. Atal hau, dena den, hobeto aztertzeko utzi dugu, izan ere, DeepFreeze bezalako aplikazio bat erabil nahiko genuke eta honekin eguneraketek zentzu guztia galduko lukete. Migraziotik kanpo geratuko lirateke administrazioko hiru ordenagailuak, irratian daukaguna (ziurrenik saretik kanpo utziko dugu), tabletpc guztiak (Colebuntuk ondo funtzionatzen badu, agian hauek ere migratuko ditugu) eta areto gelan ipiniko duguna (ekoizpen multimediara dedikatutako ekipoa izango da hau).
   • ERABILTZAILEAK: Oso puntu inportantea hau. Windows sare batetik datorren ikastola bat da gurea; hori dela eta, migrazioa ahalik eta modu gardenean gertatu behar da erabiltzaile guztientzat. Horrela, erabiltzaile bakoitzak bere logina egiten duenean, bere karpetak "Lekuak" atalean eta Nautilus-en eskuineko menuan agertzeko aukera izango du. Irakasleei laguntzearren, idazmahai finko bat zehaztuko dugu, baita Firefoxen oinarrizko konfigurazio bat. Idazmahaian irakasleek gehien erabiliko dituzten aplikazioen lasterbideak izango dituzte. Erloju eta egutegi partekatu bat ere ipiniko zaie (azken honek iCal bitartez, ikastolako agenda orokorrarekin sinkronizatuta egongo da, horrela ikastolan izango diren ekimen desberdinen berri izango dute eurek ezer berezirik egin gabe). Firefox-ekin antzeko zeozer egingo dugu; oinarrizko gehigarri sorta bat erantsiko diogu Firefoxi (Euskalbar, Xuxen, Delicious Bookmarks...) eta konfigurazio hori kargatuko zaie erabiltzaile guztiei logina egiten dutenean. Egia esatea nahi baduzu ez dakit oso ondo teknikoki nola burutu behar den hori. Gure teknikoek diotenez onfigurazio hauek .Desktop eta .Mozilla karpetetan gordetzen omen dira. Bash (???) bitartez aukera omen dago zerbitzarian gordetako karpeta hauek saio hasiera bakoitzean kargatzea. Tira, ez galdetu niri nola egiten den hori; eurek gauza erraza dela esan didate eta nik sinesten diet ;)
   • SOFTWAREA: Ekaina amaierarte hementxe daukat nik lanik handiena. Printzipioz, irakasleok erabiltzen dugun software guztia bildu eta ekipo batean probatzea tokatuko zait. Ikusi beharko dut zein software mota dugu Ubuntupean erabil dezakeguna. Kanpoan geratzen direnen artean, baloratu beharko da zein erabili daitekeen Winerekin. Azkenik, honekin ez dabiltzanak zeintzuk diren aztertu beharko dugu; kasu hauetan irakasleekin hitz egin beharko dugu zein alternatiba egon daitezkeen baloratzeko. Orain arte egin ditugun probetan, IKASDAT eta URTXINTXAKO materiala Winerekin ongi funtzionatzen dute. Aplikazioen menuan eta idazmahaian lasterbideak sortzea izango da faltatuko zaiguna.

Ekainaren bigarren astean hasiko gara prozesu guztiarekin. Datorren irailerako dena martxan izatea espero dugu. Izango ditugun gorabeheren berri emango dizuegu txoko honetan;)

[Julen]

Kaixo Miren

fundamentua ez dakit baino Lapueblako Assa ikastolan aurten hasi berriak gara sw librean oinarritutako sarearekin lanean %85an edo. Migrazioaren azken fasean gaude nolabait, erabiltzaile zailenak edo migratzen eta sw pribatiboa minimizatzen beharrezkoa duten postuetara.

Huek dira osagai nagusiak;

* debian server ( OpenLdap bahimen kudeatzailea, fitxategi eta aplikazio zerbitzaria, intranet zerbitzaria).
Ikaslek klaseko karpetak eta irakaslek pertsonalak eta orokorrak biltzen ditu.

* WIn 2003 server. Ikasdat zerbitzaria, dhcp zerbitzaria (kentzeko bidean) eta migratu ez duten erabiltzaileen pertsonalak. (script batekin sincronizatu egiten dira debian zerbitzarira, probatzen duten ehinean dena ikus dezaten).

* Backup makina sinple bat. Debian sistema eta Snapshot aplikazioarekin egunero kopia inkrementalak egiteko. Gonemdagarria oso.

* 6bat postuetan WIndows XP iraurten du: idazkari eta zuzendaritzan, orientatzaileen ordenagailuak eta irakasle geletan postu batean. APlikazio espezifikoak edo ezin direnak errez migratu, momentuz. Aurten presioa dute ikasteko.

* Assabuntu ikasle bezero guztietan oinarrizko sw bildumarekin (garapenean dagoen ubunturen remasterizazioa).
Irakasle geletan hori bera gehi ikasdat,math-type ekuazio editorea eta bestelako aplikazio batzuk.
Impresoa batzuen driverrekin arazoren bat edo baino tira ez, hobetze bidean.

Puntu honetan lanean ari naiz burubelarri, Diocesanasen distribuzioan hasierako bertsioetan lan ingurune desberdinak zituen etapa desberdinetarako, ikono haundagoak... ea.

Probatu eta dokumentatzen ari naiz, bukatzean gehituko dut.
Zuzendaritzatik 250 kopia egitea proposatu dute ikasle familia bakoitzari emateko, eta presaka nabil etxean probatzen, ea garaiz heltzen den.


jarraituko du...

[Julen]

esan bezala, hauek dira eeebuntu banaketari gehitu dizkiogun paketeak:

* eeebunturen azkenaurreko bertsioa (9.04) eta eeebuntu banaketa, nahi dugun hizkuntzan instalatzeko.
* OpenOffice 3.1 ofimatikarako Xuxen zuzentzailearekin, Mozilla Firefox 3.0 Euskalbar hedapenarekin, Java, wine eta windowseko hainbat liburutegi.
* Audio ediziorako AUDACITY programa euskaratuta.
* Audio erreprodukzioa Banshee igelera bertsioa
* Marrazketa teknikoa (CAD) QCAD euskarazko 1.5 bertsioarekin
* Marrazketa editorea GIMP, 2.6 bertsioa euskaraz.
* Bideo edizioa Kdenlive, igelera bertsioa.
* Zure pantailatik bideoa grabatzeko aplikazioa, RECORD MY DESKTOP
* Bideo erreprodukzioa VLC igelera bertsioa.
* CD / DVD grabadorea K3B.
* Formatu aldaketa anitzak egiteko FORMAT FAKTORY euskaratuta.
* Planetak ikusteko planetariuma, STELLARIUM
* Lurra ikusteko GoogleEarth
* VOZ/IP bidezko komunikazioa euskaraz SKYPE (bideokonferentzia, deia...)
* Txatetzeko eta hitz-egiteko euskaraz PIDGIN eta AMSN.
* Hezkuntzarako aplikazioak:
o Gcompris, hezkuntzarako jolas bilduma, euskaratua: zientzia, geografia, ordenagailua ezagutzeko programak... oso interesgarria 2 – 10 urte bitartekoentzat, euskaratua..
o JCLIC, internetetik unitate didaktikoak eta jolasak jaitsi eta erabiltzeko aplikazioa. Euskaraz
o Mathtype, matematikako buruko eragiketak azkartasunez egiteko jolasa, euskaraz.
o TuxType, mekanografia ikasteko euskarazko aplikazioa.


Hauetaz gain, sistema eragile arrunt batean topatu ditzakegun aplikazio eta jolas guztiak aurkituko ditugu: Bitorrent, ftp, posta bezeroa... etb. luze bat.

Eta azkenik gure ikastolaren logoa jarrio diogu ;-P

Etorkizunerako:
Ingurune desberdinak erabiltzaile desberdinetarako: HH, LH, DBH, DBHO
SketchUp 3d editorea
Zirkuituak eta fisikarako aplikazioren bat
Euskaratzen ari den OpenShot bideo editorea
eta beste hainbat... hori bai asanbladatik pasa ostean.